Tuesday, November 20, 2007

اشمعني انا ؟

كتير بنسمع عن محبي فلان و محبي علان
و كتير بنسمع عن مشجعي الفلان و مشجعي العلان
لكن ليه لازم الي بيحب فلان يكون بيكره علان و ليه لازم الي بيشجع الفلان يكون ضد العلان
نوضح اكتر ... ليه لما نتكلم عن عمرو دياب مثلا و حد يقول انا بحبه , يرد واحد عليه يقولوا لا انا بحب تامر , ليه مردش و قال انا ما بحوش ؟
و مثلا لما نيجي نتناقش في الكرة و نقول عماد متعب جامد , يقوم واحد يرد و يقول لا عمرو زكي اجمد
ليه دايما بنرد علي الكلام غلط , ليه دايما كل حاجه ليها ضد
و خلي بالك انا لسه بتكلم عن حجات من ( وجهه نظري ) مش مهمه و لكن الي بيحصل ده بيحصل كمان في الحجات المهمه
يعني لما يجي واحد من الوفد يتكلم مع واحد من الاخوان , و يقول الوفدي ان سعد زغلول هو افضل زعيم وطني لمصر و كمان صاحب خير علي مصر يقوم يرد الاخواني و يقوله لا ده البنا او الهضيبي هما فعلا اصحاب الفضل علي مصر لكن للاسف عشان اعداء النجاح محققش الي كان عايزة
او مثلا لما نتكلم في الاديان و نقول محمد ده انسان محترم و مؤدب , يقوم يرد واحد تاني و يقول انت مش شايف مايكل ولا ايه
الحجات ديه كلها متبدله بين المسلمين و المسيحين و الاخوان و الوفدين و الاخرين من السياسه علي اعتبار ان الوفد ام الليبراليه
و مقدرش انسي ان الاهلاويه و الزملكويه بينهم الشئ ده , ده حتي ظهر اوي الشئ ده ساعت ماتش الاهلي و النجم لما اغلب الزملكويه كانوا بيشجعوا النجم , بس عشان بيلاعب الاهلي , و طبعا لا انكر ان الاهلويه بيعملوا كده لما الزمالك يلعب مع حد غريب
هل ده مرض عند المصرين ؟ ام هو فقط عدم احترام الاخر
اشمعنا انا الي لازم اكون صح
ما هو ممكن يكون الوفد صح و الاخوان غلط او الاخوان هما الي صح و الوفد غلط ؟
بالمره ( انا كنت منضم للوفد زمان لغايه ما ربنا هداني الحمد لله , بس برده ما انضمتش للاخوان ) و ده مش معناه ان الوفد غلط ولا الاخوان
و ليه لما نتكلم عن القرضاوي مثلا يقوم يرد و احد و يقول لا انا بسمع عمرو خالد
طب ما تسمع عمرو خالد , هل ده معناه ان القرضاوي وحش
و احتمال ان عمرو دياب هو افضل من تامر او تامر افضل من عمرو ؟
علي فكرة انا بحب عمرو و تامر بس التوب عندي هو العسيلي و كاظم و عمرو مصطفي لاكن ده مش معناه ان عمرو دياب و تامر وحشين لا طبعا عمرو و تامر في ناس كتير بتحبهم و انا كمان بحبهم بس بحبهم عشان جمال صوتهم فقط , بس اعمل ايه ودني بترتاح مع العسيلي و كاظم و عمرو اكتر ولولا اختلاف الاذواق ... لبــ
و ممكن يكون الزمالك احسن من الاهلي لكن انا بشجع الاهلي و بحب الاهلي و مش معني كده اني اكره الزمالك
لازم الواحد يفرق بين حبه لشئ و كره لنقيض الشئ
اشمعنا انا علطول الصح ؟ اشمعنا انا اختياري لاي شئ هو الي صح و الباقي غلط ؟
كل شئ يحتمل الصواب و الخطا
الا احنا علطول صح

Saturday, November 17, 2007

فضيله الدكتور علي جمعه مفتي الديار المصرية


من فترة كده و الكلام كتر علي مفتي الديار المصريه بسبب بعض الفتاوي الي صدرت منه و اهما فتوي الشباب الي غرقوا

المفتي عمل مؤتمر صحفي عشان يرد فيه عليهم , المؤتمر ده اذاعته قناه دريم ببرنامج العاشرة مساء

بدا المفتي كلامه عن الموقف السئ الي واخده منه الصحافه وقال " ان اتهام دار الافتاء يتسيس الفتوي للحكومه غلط غلط

بدليل ان الفتوي الي خرجت من شهر 6 بوصف الانسان الي يرمي نفسه علي سيارة مسرعه يبقي بينتحر , و ان الفتوي دي بيتكلم عنها اسامه الروبي في كتاب انتج في شهر 7 و احنا دلوقتي في شهر 11 ليه بقي الصحافه ربطت بين الفتوي و حادث الفتاه الريفيه انا مش عارف , و كمان فتوي حرق قش الارز فدار الافتاء طلعها عشان فشل الحكومه و المواطنين انفسهم و الجمعيات الاهليه من الحد من هذا الضرر , و كان معتمدين علي ( لا ضرر و لا ضرار ) و ( لا تلقوا بايديكم الي التهلكه ) و ان مش غلط ولا حرام ان دار الافتاء فتوي لمنع الضرر و التلوث الهوائي , ذي فتوي منع مكبرات الصوت من العمل لعدم ضر الغير من مريض او طالب يذاكر او رجل نائم و تخصيص اوقات معينه لتشغيل مكبر الصوت , و بعدين انتوا بتقولوا ليه دار الافتاء ما اصدرش فتوي بخصوص تزوير الانتخبات , لا اصدرنا مش فتوي واحده لا تلاته , واحده تحرم التزوير و احده تحرم الغش و واحده تحرم اشتراء الاصوات و لكن الصحافه منشرتهمش كالعاده ليه بقي معرفش, و بالنسبه لقضيه الغرق فانا كنت في الجامعه و كنا بناقش القضيه بشكل اعمق , يعني حد ممكن يقولي ايه الي يخلي واحد قدر انه يجيب 25 الف جنيه يسافر ايطاليا , ليه ما يستفسدش منهم هنا ايه الي يخليه يسافر و يعرض نفسه للموت هل هو الطموح او حب المغامرة او طمع او ناس بتستفيد منهم او ناس بتحركهم ما هي حاجه غاريبه و لازم يكون السبب حاجه من دول والله اعلم " ختم المفتي كلامه بالله اعلم و مضي

ولكن الصحفيون طلبوا منه الرجوع للرد علي بعض اسئلتهم فلبي ندائهم و عاد رغم انشغاله

و اتكلم فضيله المفتي عن علاقه الصحافه السيئه به و اقال ان الصحفي يطلع اشاعه او يحرف فتوي او ينقاها غلط و يصدق نفسه و اوقل ما دار الافتاء تقول انها مقليتش كده يقوم الصحفي يقول في مقال اخر ان دار الافتاء تراجعت و الحمد لله دار الافتاء لمم تتراجع قط من يوم نشاتها لان اخراج الفتوي ليس بامر بسيط يتطلب الدراسه و التدقيق

ثم طلب من الصحافه فتح قلوبها و عقولها اولا و بمحاسبه الصحفين ليس فقط لانهم تعدوا علي السلطه او جرحوا في ناس كبار و لكن لو ايضا غيروا في الفتاوي لان هذا اضر من التجريح في الكبار او سب السلطه
فعلا انا مش فاهم هما ليه بيعملوا كده , ليه الصحافه بقيت مهمتها الوحيده انها تجيب منشيت يخلي الجرائد تتباع
هل هو قله خبرة المحررين ؟ هل هو غياب وعي المصرين ؟ ام هو قله العائد ؟
فعلا الصحفي الي يغير فتوي او يحرف فيها لابد انه يتحاسب عشان اكيد هيضر ناس كتير
شكرا سيدي فضيله المفتي


Friday, November 16, 2007

فاروق ملك مصر


سبق اني اتكلمت عن دور الفن السابع من سينما او مسلسل في تغير الرؤيه تجه شئ معين و لكن تغير الفكر عن الملك فاروق من طاغيه لرجل وطني , اكيد شئ غريب جدا
فكان لازم نشوف مين فاروق ده
الملك فاروق اخر ملوك مصر تم عزله عن عرش مصر بيد الضباط الاحرار عام 52 و كان بيزعموا ان الفساد كان للركب في عصره
طب واحده واحده الضباط الاحرار دول اكيد من الجيش المصري يعني كانوا عاملين مش عاطلين ذي دلوقتي
ثانيا قالوا ان الفساد كان تفشي في الجيش بسبب الملك و حاشيته و الناتج عن كده خساره 48 و الاسلحه الفاسده طب ما في زمن جمال عبد الناصر خسيرنا 56 و كمان نكسه 67 و الاسلحه ايه كانت لسه علي الارض و بعدين اذاي تحكموا فاروق علي حاجه ملوش دخل فيها , يعني ينفع لما الاهلي يخسر نقيل حسن حمدي لا طبعا , اينعم هو مسؤال عن الاهلي ككل و لكن ملوش دخل في الفريق الا بتوفير الامكنيات
ثالثا :- الديموقراطيه , لم تتحقق بسقوط الملك من عام 52 حتي الان و لكن كانت متحققه في عصر فاروق يكفي اننا شوفنا منورات الوفد بقياده النحاس و الاخوان بقياده البنا و كمان كل الافكار الاخري كان فارق بيعملها حساب
اخيرا لو قعدنا نحسب ده عمل ايه و ده عمل ايه فاروق هيكتسح , ده كفايه الي عملوه في الانجليز و كمان جامعه الدول العربيه الي عملها
و لو فكرنا لو كان فاروق لسه موجود اكيد مكنش في نجيب ولا ناصر و لا السادات و خصوصا مفيش مبارك
هل كانت مصر هتبقي ذي دلوقتي
و انا بكتب السطرين دول افتكرت عماره يعقوبيان في مشهد عادل امام و هو سكران مع هند صبري في الشارع و كان بيقول
انتي قلتيلي ليه سبت باريس و لندن و جيت مصر لان مصر مكنتش كده كانت الموضه بتنزل هنا اقبل بره , الشوارع كانت نظيفه البيوت كانت جميله الناس كانت مؤدبه دلوقتي العيشش زباله فوق البيوت و من تحت مسخ
احنا في زمن المسخ
شكرا لكل من ساهم في اخراج هذا العمل الي النور , شكرا سوريا
شكرا الملك فاروق

كبير يا أهلي


يوم 9\11\2007 كان يوم تقيل علي قلبي اوي و اظن كان يوم صعب علي كل الي بيحبوا الاهلي خاصه و بيحبوا مصر عامه
كلامي انهرده عن الي حصل من فريق الاهلي ممكن يكون غريب علي ناس كتير
باختصار , فعلا الاهلي عمل الي عليه و خصوصا مانويل جوزيه , الخطه الي كان بيلعب بيها كلنا عارفينها من زمان , اكيد في شويه اختلاف من معظمنا علي عدم نزول وئل جمعه صخره دفاع مصر و اكيد في اختلاف علي عدم نزول اسامه حسني القناص و كمان اختلاف علي نزول قناوي مكان جيلبرتوا
بصراحه احمد السيد يقل في المستوي عن جمعه لكن برضوه يقل في السن و ده الي كان مطلوب مع التونسه و فعلا احمد السيد تفوق علي نفسه في السرعه و القوه و اللياقه
اما اسامه حسني صغر جسمه مكنش ينفع معاهم ده فلافيو كان هينضرب
و قناوي بقي ده الي حالته حاله جوزيه لما رد عن دفعه لقناوي قال ان قناوي صغر جسمه هو السبب في دفعه بيه لانه سهل يدخل جوه ال18 و يجيب بلنتي و لكن ضحك عليك العرجون يا جوزيه و لم يحتسب شئ و لا حتي بلنتي ابو تريكه
الماتش خلص و مش عايزين نبكي علي اللبن المسكوب و نقف جنب النادي بتاعنا عشان يجتاز هذه المرحله
لاكن كلامي بقي هو عن اللي حصل بعد الماتش
لما تفتح قناه دريم علي برنامج الرياضه اليوم و تشوف مصرين بتحتفل بفوز النجم علي الاهلي و يتضح انهم من الدراويش
لما تفتح الماسينجير و تشوف شماتت الزمالكويه
يبقي الناس ديه فهما اللعبه غلط
احنا ايه ذنبنا انهم عمالين يطلعوا مبكرا من كل البطولات , ايه ذنبنا انهم مش عارفين يفوزا علينا هو انا لازم احمل خدي مداس عشان اعجب
عشان نبسط فهم الموضوع
لو مثلا اخوك او باباك ضربك ينفع تروح تجبله ناس تصربه او حتي لما ينضرب تفرح فيه , يا جماعه ديه ولا اخلاقنا و لا مبادئنا , ايه الي عملوه الاهلي عشان يتعمل فيه كده
اقولكم بصراحه السؤال ده كان تاعبني اوي لغايه ما لقيت الرد
اكثر الانديه كرها في انجلترا مانشستر يونيتد و في المانيا باير ميونخ و اسبانيا ريال مدريد و ايطاليا الميلان و ده راجع لاعداء النجاح
مش بس الكاف و لا العرجون و لا العرب و لا الافارقه كلهم لكن كمان المصرين كارهينا لاننا ناجحين و ماشين صح 102 بطوله في 100 سنه
كمل مشوارك يا أهلي , كبير يا أهلي

بسم الله الرحمن الرحيم

من زمان و انا نفسي اعمل مدونه ليه اعبر فيها عن نفسي اتكلم فيها من نفسي اقول الي عايز اقول برضوه من نفسي
و اقبل كده كنت عملت كذا مدونه لجروبات بطبيعه عملي فيها ذي البلد بلدنا و شباب الخير و غيره و غيره
و كمان كنت عملت ليه انا كذا مدونه ذي الفن السابع و ابو حميد المصري و الفريضه الغائبه لكن كل ده عمره ما عبر عن حاجه في نفسي , اما كنت بتكلم عن حاجه واحده او عن حاجت حد , مفيش مدونه واحده بتكلم فيها عن افكاري كل افكاري , كل الي بيجي في دماغي
لكن الحمد لله جيه الوقت الي نبدا فيه بمدونه تتكلم عن كل حاجه بدور في دماغي و بتحصل دلوقتي
و ده كله هيكون كلام في سرك